Lagu Lama

Orang Sakti

"Assalamu 'alaikum, lagi ngapain Jak, kayanye lu sibuk banget?" sapa Badu pada sohibnya Jaka yang lagi memotong kayu.
"Wa'alaikum salam, eh elu Du, ini gue lagi bikin pestol-pestolan buat adek gue si Adun," jawab Jaka sambil ngumpulin potongan-potongan kayu yang baru dibuatnya.
"Kretif juga lu," kata Badu, "Ngomong-ngomong soal pestol-pestolan, gue punya tebak-tebakan nih."
"Ah elu mah kaga jauh dari tebak-tebakan. Coba ape pertanyaannye?" sahut Jaka sambil ngampelasin potongan kayu tadi.
"Nih pertanyaannye. Orang ape yang kaga mati ditembak?" tanya Badu sambil ikutan ngampelasin juga.
"Ah itu mah kecil, kaga ade pertanyaan laen ape. Jawabnye tuh orang kebal," kata Jaka merasa menang.
"Salah," sahut Badu.
"Kalo bukan orang kebal, pasti orang sakti," kata Jaka sambil merangkai potongan-potongan kayu tadi.
"Salah juga," ujar Badu.
"Orang kebal bukan, orang sakti juga bukan, abis ape dong jawabannye?" kata Jaka mulai keki.
"Jawabannye, orang kaga kena, mana mati ditembak," kata Badu cengengesan.